Atleta di aña
Atleta di aña

Antoine Maduro

Sr. Antoine Maduro durante su trayektorio den deporte a kumpli ku aktuashonnan meritorio tantu komo hungadó i dirigente atministrativo. Sr. Maduro tabata aktivo komo futbolista di aña 1925 te 1941 komo miembro di e klupnan Trappers i S.U.B.T. ,di 1941 te 1950 sr.Maduro a keda aktivo komo veterano. Su ekselente kualidatnan komo linksbèk a dun’é oportunidat pa defendé e kolónan di Kòrsou den selekshon, kaminda tambe sr. Maduro a fungi komo kapitan. Komo entrenadó i tambe sr. Maduro a sobresalí i fuera di a entrená tantu Trappers komo S.U.B.T. sr. Maduro a haña e privilegio pa entrená nos selekshon nashonal ku a partisipá den weganan Internashonal di 1950 te 1953, na entre otro Finlandia, Guatemala i Costa Rica.

Komo dirigente sr. Maduro tabata fundadó di tantu Trappers komo S.U.B.T. kaminda el a okupá vários funshon den direktiva.
Di 1932 te 1946 Sr. Maduro tabata miembro di C.V.B.”(Curacaose Voetbal Bond)” den funshon di sekretario i tambe “kompetitieleider” Kosnan grandi ku sr. Maduro a realisá sin duda ta e konstrukshon di loke a bira awe e Stadion di S.U.B.T. Sin ningun fondo finansiero nan a disidí pa tuma e kurashi pa bai kumpra e tereno na Kustbatterij i despues ku e doño di tereno a bai di akuerdo pa bende e tereno na rason di Fl.1.00 pa meter kuadrá, nan a organisá algun loteria pa por a kumpra e tereno na 1948.Tambe mester menshoná ku riba inisiativa di sr. Maduro, S.V. Trappers a bira e promé klup di futbòl ku a kumpra un reglamentu di futbòl serka K.N.V.B. “Koninklijke Nederlands Voetbal Bond”.

Imaginá bo ku ni C.V.B. (“Curaçaose Voetbal Bond”) mes no tabatin un reglamentu ofishal ainda e tempu ei. Na 1938 huntu ku sres.nan Corasol i Lodowika, Antoine Maduro a tradusí e buki di reglamentu di futbòl na papiamentu. Dia 1 di yüni 1952 sr. Antoine Maduro a tuma e desishon pa retirá for di deporte di futbòl i e tempu ei tambe komo dirigente di S.U.B.T.

Antoine Maduro:
A risibi e sigiente premio i kondekorashonnan:

* Emacipatie Prijs na 1969
* Apostolicam Benedictionem na 1977
* Premio Pierre Lauffer Chapi di Plata na 1982
* Personahe di Aña na 1983
* Doctor Honoris Causa (Universiteit van de
* Nederlandse Antillen) na 1984
* Officier in de Orde van Oranje Nassau.

 

Dia 25 yüni 1997 a drenta e lamentabel notisia ku Antoine a fayesé.