Atleta di aña
Atleta di aña

Celsio Victor Polinet

CELSIO POLINET

Celsio Victor Polinet (Futbol)

Deportista

a nasé dia 15 di yüni 1939.

Celsio Polinet a nase dia 15 di yüni 1939 na Kòrsou.                                                                                                                    E la biba den Dòmi i Mundu Nobo i bai skol un ratu na Niewindt College i despues na St. Thomas College tantu abou komo ariba.

Polinet, for di edat hóben, na aña 1954, a praktiká futbòl riba e tereno di bala na Mundu Nobo, hungando asina un chèns presentá ku e ekipo di Estudiantes komo “linksbuiten” i despues den Sithoc Jr. Ta despues, riba un dia i riba petishon di Frater Andreas, Polinet a bai hunga den gol.                                                                                

Polinet, dado momentu, na edat di 15 aña i 8 luna, a hañ’é ta remplasá Reintje Minguel, ku a disidí di bai konsentrá riba vòlibòl en bes di futbòl. Na aña 1955, Polinet a debutá ku e promé onsena di Sithoc, kulminando su karera den Sithoc, ku e promé título di kampion di Kòrsou na aña 1961 I 1962, bou di direkshon tékniko di Shon Haseth.                                                                                                                                            E Sithoc di entre otro Toka Beltrand, Jossy Bibiana, Ro Valerian, Carlos Regales, Ruben Cathalina, Kalulu Comenencia, Eugene Testing, Ronald Pinedo, Ronchi CarloiI Olario. Den Sithoc aki, Celsio Polinet a haña e bijnaam di “onze keeper”.                                                                                                       

No a dura mashá, ku Polinet a haña invitashon serka e direktor tékniko di e tempu ei, Don Pedro Da Cunha, pa e djòin selekshon B di Kòrsou, kaminda e mester a kompetí  ku Ergilio Hato i Chebu Pinedo pa subi i yega na un puesto den selekshon A.                                                                                                                                                          Polinet ta debutá na aña 1956, remplasando Ergilio Hato, kontra e ekipo brasileño Botafogo i a bira despues e kiper di konfiansa di Pedro da Cunha, ku tabata yama Celsio, “Polinetti”.

Polinet, despues di esei a sigui desaroyá I progresá komo kiper, hungando mas ku 60 wega internashonal, defendiendo gol di Antia/Kòrsou  kontra entre otro selekshonnan di Méhiko, Costa Rica, El Salvador, Guatemala, Haiti, Honduras, Sürnam, Colombia, Venezuela, Hulanda.                                                                                                                                                            Ekiponan mundialmente konosí ku Polinet a topa ta entre otro Fluminense, Santos, Flamengo, Botafogo, tur di Brasil, Universidad Católica di Chile i Danubio di Uruguay.

Klaro ku Polinet a haña tambe diferente oferta pa hunga futbòl den eksterior. Di México, Costa Rica, di Schalke 04 (ekipo aleman) i di Dinamarka.

 

 

E ANANAN KU CELSIO POLINET A DESTAKA KU SU AKTUASHON:

1955: Polinet ta debutá ku e promé onsena di Sithoc i ta bira tambe un di e kipernan di selekshon di Antia/Kòrsou.

1956: Polinet remplasando Ergilio Hato kontra Botafogo di Brasil                                                                                                                                                               

1956: Kiper di e selekshon hubenil (te ku 18 aña) na e Kampeonato Sentro Amerikano i di Karibe na El Salvador, birando sup-kampeon tras di El Salvador. Aki prensa salvadoreño a duna Polinet e bijnaam di “el hombre elástico”.

1957: Kiper di selekshon na Weganan Sentro Amerikano i di Karibe akí na Kòrsou, birando sup- kampeon tras di Costa Rica, ku a bai ku e título.

1958: Kiper di e selekshon di Kòrsou riba un gira pa Oropa, hungando entre otro na Hulanda, Dinamarka, Suesia, Noruega, Alemania i Fransia.

1959: Kiper di e selekshon di Kòrsou kontra Santos di Brasil, ku a kaba di bira kampeon di mundu di klupnan, defendiendo su gol kontra Pele.

1961 – 1962: Kampeon di Kòrsou ku Sithoc di Shon Haseth.